सोमवार, कार्तिक १७ गते २०८३
- ट्रेण्डिङ :
- # समाज
- # मनाेरञ्जन
नेकपा माओवादी केन्द्रको युवा संगठन योङ कम्युनिस्ट लिगले दार्चुलामा महाकाली नदीको तुइनबाट युवक खसेर बेपत्ता भएको विषयमा भारतसँग जवाफ माग्न सरकारलाई आग्रह गरेको छ । शनिबार विज्ञप्ति निकालेर वाईसीएलले काठमाडौंस्थित भारतीय दूतावाससँग स्पष्टीकरण लिएर घटनाबारे सत्य तथ्य बाहिर ल्याउन आग्रह गरेको हो । भारतीय सीमा सुरक्षा बल (एसएसबि) ले तुइनको फलामे तार काटिदिएका कारण दार्चुलाको ब्यास गाउँपालिका–२ निवासी ३० वर्षीय युवा जयसिंह धामीको महाकाली नदीमा डुबेर मृत्यु भएको समाचार आएको थियो ।
वाईसीएलका अध्यक्ष रामप्रसाद सापकोटा र महासचिव सुवोधराज शेर्पालीले प्रेस विज्ञप्ति जारी गर्दै यस घटनालाई अमानवीय र भारतीय पक्षको ज्यादती भएको बताएका छन् । नेपाल र भारत भौगोलिक दृष्टिले छिमेकी हुनुका नाताले सीमा एवं आर्थिक–सामाजिक क्षेत्रमा बहुआयामिक सम्बन्ध रहिआएको तर भारतले असल छिमेकीको भूमिका नखेलेको वाईसीएलले बताएको छ । नेपालको भौगोलिक अखण्डता र राष्ट्रिय स्वाधीनता एवं स्वाभिमानमाथि भारतीय सत्तापक्ष र सुरक्षा फौजले पटकपटक ज्यादती गरेको भन्दै वाईसीएलले छिमेकी मुलूकसँग भारतको सम्बन्ध दिन प्रतिदिन खस्किँदो क्रममा रहेको पनि उल्लेख गरेको छ ।
‘शुक्रबार भारतीय सुरक्षा फौजबाट गरिएको ज्यादतीको यथार्थ छानविन गरी कुटनीतिक स्तरबाट देशको स्वाभिमान र नागरिक जीवनको सुरक्षा एवं मृतक र तुइन काण्डबाट पीडित नागरिकको अभिभावकत्व र यथोचित क्षतिपूर्ति एवं राहतका निम्ति नेपाल सरकारसँग जोडदार माग गर्दछौं’ विज्ञप्तिमा भनिएको छ, ‘नेपाल सरकारका तर्फबाट भारतीय राजदूतावासलाई घटनाको स्पष्टीकरण लिन समेत माग गर्दर्छौ ।
