सोमवार, कार्तिक १७ गते २०८३
- ट्रेण्डिङ :
- # समाज
- # मनाेरञ्जन
लुम्बिनीमा सूर्य चिह्नबाट चुनाव जितेका २ सांसदलाई कारबाही गर्न नसकिने लुम्बिनी प्रदेश सभाका सभामुख पूर्णबहादुर घर्तीले निर्णय गरेको छ । सभामुख घर्तीले प्रदेश सभा सदस्य (सांसद) अजय शाही र विमला खत्री (ओली)लाई पदमुक्त गर्न (सांसद पदबाट हटाउन) नसकिने निर्णय गरेका हुन् ।
सूर्य चिह्नबाट निर्वाचित भएका उनीहरुले राजनीतिक दलसम्बन्धी ऐन विपरीत माओवादी केन्द्रका कुलप्रसाद केसी (सोनाम)लाई मुख्यमन्त्रीमा समर्थन गरेकाले प्रदेश सभा सदस्यबाट कारबाही गरिएको भन्दै एमालेले प्रदेश सभा सचिवालयलाई पत्र पठाएको थियो । नवलपरासी पश्चिमबाट सूर्य चिह्न लिएर (हृदयेश त्रिपाठी समूह)बाट निर्वाचित स्वतन्त्र प्रदेशसभा सदस्य शाही र दाङको उपनिर्वाचनमा नेकपाबाट विजयी भएर नेकपा विघटनपछि माओवादी केन्द्र रोजेकी ओलीलाई एमालेले कारबाही गरेकाले पदमुक्त गर्नुपर्ने एमालेको अडान छ ।
दुवै जनालाई पदमुक्त नगरिएको भन्दै एमालेले प्रदेश सभा बैठक समेत अवरुद्ध पार्दै आएको छ । सभामुख घर्तीले भने एमालेले कारबाही गरेको सूचनाबारे सदनमा जानकारी दिन नसकिने निर्णय गरेको छ ।
प्रदेश सभा सचिव दुर्लभ कुमार पुन मगरले जारी गरेको सूचनामा राजनीतिक दलसम्बन्धी ऐन २०७३ को दफा ३५ बमोजिम एमालेले गरेको कारबाहीको सूचनाबारे सदनलाई जानकारी दिन नसकिने निर्णय भएको बताइएको छ । सचिवालयले दुवै सांसदलाई पदमुक्त गर्ने आधार नभएको भन्दै पदमुक्तको सूचना जारी गर्न नमिल्ने पत्र पठाएपछि एमालेले पत्रकार सम्मेलन गरेर सभामुखको राजीनामा माग गरेको हो ।
