शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
पोखरा । निर्वाचन आयोगले नव गठित नेकपा एकीकृत समाजवादी पार्टीका पक्षमा लागेका बागमती प्रदेशसभाका १३ सांसदले गरेको सनाखतलाई मान्यता दिएको छ ।
आयोगले शुक्रबार बागमती प्रदेशसभा निर्वाचनमा नेकपा एमालेबाट निर्वाचित १३ सदस्यलाई राजनीतिक दलसम्बन्धी अध्यादेश तथा प्रचलित कानुन अनुसार नयाँ दलको सांसदको रुपमा मान्यता दिएको हो ।
आयोगका अनुसार प्रदेशसभा सदस्य राजेन्द्र पाण्डे, कृष्णप्रसाद खनाल, मुनु सिग्देल, रमा आले मगर, लक्ष्मण लम्साल, बसुन्धरा हुमागाई, माधव पौडेल, वसन्त मानन्धर, पार्वती सिलवाल, कुसुम कार्की, इन्द्रमाया गुरुङ, मीना ज्ञवाली नेपाल र राजेन्द्रमान श्रेष्ठलाई नयाँ दलको सदस्यका रुपमा मान्यता दिइएको हो ।
आयोगले १३ सांसदले गराएको सनाखतलाई मान्यता दिएसँगै बागमती प्रदेशसभामा नेकपा एमाले नेतृत्वको सरकार अल्पमतमा परेको छ ।
प्रदेश २ प्रदेशसभाका १३ सांसदले गरेको सनाखतलाई मान्यता
निर्वाचन आयोगले नव गठित नेकपा एकीकृत समाजवादी पार्टीका पक्षमा लागेका प्रदेश २ प्रदेशसभाका १३ सांसदले गरेको सनाखतलाई मान्यता दिएको छ ।
आयोगले शुक्रबार प्रदेश २ प्रदेशसभा निर्वाचनमा नेकपा एमालेबाट निर्वाचित १३ सदस्यलाई राजनीतिक दलसम्बन्धी अध्यादेश तथा प्रचलित कानुन अनुसार नयाँ दलको सांसदको रुपमा मान्यता दिएको हो ।
आयोगका अनुसार प्रदेशसभा सदस्य गोविन्दबहादुर न्यौपाने, मदन सेन प्रसाद श्रीवास्तव, प्रमोदकुमार यादव, बेची लुंगेली, नागेन्द्र राय यादव, मन्जुकुमारी यादव, शत्रुधन महतो, रविन्द्र बैठा धोबी, अशोककुमार यादप, हसिमा खातुन, सुन्दरबहादुर विश्वकर्मा, सिता गुरुङ र डिल्लीप्रसाद उप्रेतीले नेकपा एकीकृत समाजवादी पार्टीका सांसदका रुपमा मान्यता पाएका हुन् ।
राजनीतिक दलसम्बन्धी अध्यादेश अन्तर्गत नेकपा एमाले र जसपा नेपाल एकसाथ विभाजित भएपछि आयोगले दुवै दलका प्रदेशसभा सदस्य तथा स्थानीय तहका जनप्रतिनिधिलाई भदौ २२ गते अपराह्न ५ बजेसम्म नयाँ दल रोज्न समय तोकेको थियो ।
सो अवधिभित्र आयोगको कार्यालय पुगेर सनाखत गराएका प्रदेशसभा सदस्यहरूका बारेमा आयोगले शुक्रबार औपचारिक निर्णय गर्दै सनाखत गरेको आधारमा नयाँ दलको सांसदको रुपमा मान्यता दिएको हो ।
