एजेन्सी । अमेरिकी राष्ट्रपतीय चुनाव नजिकिदै गर्दा विभिन्न देशको प्रभावका विषयमा संसारभर चर्चा परिचर्चा भइरहेको छ । आउँदो नोभेम्बर ३ तारेखमा हुने चुनावका लागि राष्ट्रपति डोनाल्ड ट्रम्प र पूर्वउपराष्ट्रपति जो बाइडनबीच प्रतिस्पर्धा हुँदैछ । अमेरिकी एक वरिष्ठ गुप्तचर प्रमुखले चीन, रुस र इरानले यो वर्ष हुने अमेरिकी राष्ट्रपतीय निर्वाचनलाई प्रभावित पार्न खोजिरहेको चेतावनी दिएका छन् ।
नेसनल काउन्टर इन्टलिजेन्स एन्ड सेक्युरिटी सेन्टर (एनसिएससी) का निर्देशक विलिअम इभानिनाले विज्ञप्ति नै जारी गरेर ती देशले मत प्रभावित गर्न गोप्य र खुला प्रभावका उपायहरू प्रयोग गरिरहेका दावी गरेका छन् । चीनले राष्ट्रपति ट्रम्प पुनर्निर्वाचित हुनुपर्छ भन्ने चाहेको छैन भने रुसले डेमोक्रयाटिक उम्मेदवार बाइडनलाई धक्का दिन खोजेको इभानिनाको दावी छ ।
गुप्तचर प्रमुखहरूले रुसलाई सन् २०१६ को निर्वाचनमा हस्तक्षेप गरेको आरोप लगाउने गरेका छन्। उनीहरूका अनुसार रुसले अनलाइन माध्यमबाट मिथ्या सूचनाहरू फैलाएर ट्रम्पको निर्वाचन अभियानलाई सघाउन चाहेको दावी गरिएको छ । रुसले भने आरोपलाई अस्वीकार गरेको छ । शुक्रबार नियमित पत्रकार सम्मेलनमा चुनावी हस्तक्षेपका समाचारबारे ट्रम्पलाई प्रश्न सोधेको र उनले आफ्नो प्रशासनले निकै नजिकबाट हेरिरहेको प्रक्रिया दिएका थिए ।
ट्रम्पले हुलाकबाट हुने मतदान जोखिमपूर्ण हुने दाबी गरिरहेका बेला यस्तो भनाइ आएको बिबिसीले जनाएको छ । ट्रम्पले 'इतिहासमै सबैभन्दा त्रुटिपूर्ण र कपटपूर्ण चुनाव' हुनुभन्दा बरु त्यसलाई पर सार्न सकिने बताउने गरेका अमेरिकी सञ्चारमाध्यमले जनाएका छन् । तर, उनको भनाइको आफ्नै पार्टीभित्र पनि विरोध हुने गरेको छ ।
डेमोक्र्याटिक सांसदहरूले गुप्तचर निकायहरूले यो वर्षको चुनावमा विदेशी हस्तक्षेपबारेका सूचना जनताहरूलाई नदिएको आरोप लगाएका थिए। शुक्रवार एनसीएससीका प्रमुखले जारी गरेको विज्ञप्तिमा विदेशी राष्ट्रहरूले मतदाताका रोजाइलाई बिथोल्न खोजेको समेत उल्लेख गरिएको छ ।
