भाद्र ३, २०७७ बुधवार
•
१५:२६:२३ बजे
राष्ट्रकवि माधवप्रसाद घिमिरेको जन्मथलो लमजुङको मर्स्याङ्दी गाउँपालिकामा बुधबार सार्वजनिक बिदा दिइएको छ । घिमिरेको सम्मानमा बुधबार एक दिनका लागि गाउँपालिकामा सार्वजनिक बिदा दिने निर्णय गरिएको गाउँपालिकाका उपाध्यक्ष होमबहादुर विकले बताउनुभयो ।
घिमिरेकाे विसं १९७६ असोज ७ गते लमजुङको तत्कालीन बाहुनडाँडा गाविसको भीरपुस्तुनमा जन्म भएको थियो ।
राष्ट्रकवि घिमिरेकाे मङ्गलबार साँझ आफ्नै निवासमा निधन भएकाे हाे । उहाँले कवितासँगै साहित्यका अन्य विधामा पनि कलम चलाउनुभएको छ ।
घिमिरेले कविता, खण्डकाव्य, गीतिनाटक, कथा, अनुवाद, लेख, प्रबन्धलगायतका क्षेत्रमा कलम चलाउनुभएको छ । तीमध्ये राष्ट्रकवि घिमिरेका गौरी शोक काव्य सबैभन्दा चर्चित छ ।
उहाँका ‘नवमञ्जरी’, ‘घामपानी’, ‘नयाँ नेपाल’ र ‘किन्नरकिन्नरी’ आदि कविता सङ्ग्रह प्रकाशित छन् । स्वच्छन्दतावादी भावधाराका कवि घिमिरेका ‘गाउँछ गीत नेपाली’ जस्ता कैयौँ राष्ट्रिय भावका गीत तथा कविताहरू लोकप्रिय छन् ।
घिमिरेको जन्मथलो मर्स्याङ्दी गाउँपालिकामा ‘राष्ट्रकवि माधवप्रसाद घिमिरे स्मृति पार्क’ पनि निर्माण भइरहेको छ ।’
