- ट्रेण्डिङ :
बरंजा - म्याग्दी मंगला गाउँपालिका वडा नम्बर ३, बरंजा आर्भाङ स्थित श्री महेन्द्र रत्न माध्यामिक विद्यालयले ६४ औं वार्षिक उत्सव भव्यताका साथ मनाएको छ ।
विद्यालय व्यवस्थापन अध्यक्ष कर्ण बहादुर थापा (बिलभ) को अध्यक्षता र शिक्षक केशवको संचालन रहेको कार्यक्रमा मंगला गाउँपालिका वडा नम्बर ३ का वडा अध्यक्ष याम रोकाको प्रमुख आतिथ्यता रहेको थियो । त्यसैगरी काठमाण्डौबाट आएका प्रशिक्षक इश्वर श्रेष्ठ विशिष्ट अतिथि र अतिथिमा सनसाइन बोर्डिङ्ग स्कुलका संस्थापक बिरेन्द्र रोका, वडा नम्बर ३/४ का दलित महिला प्रतिनिधी, मन कुमारी विक, सिरकला विक लगायत वडा नम्बर ३ का वडा प्रतिनिधि र चन्दा दाता रहेका थिए।
कार्यक्रममा शिक्षीका रिता सापकोटाले स्वागत मन्तव्य राखिन भने आर्थिक प्रतिवेदन लेखा कर्मचारी नरमाया रोकाले प्रस्तुत गरेकि थिइन । प्रमुख अतिथि याम रोकाले वडाले सकेको सबै किसिमको सहयोग गर्न तयार रहेको बताए । उनले केहिसमय पहिला यस स्कुलको संयोजक रहेर काम गरेका थिए ।
विद्यालयको वार्षिक उत्सव कार्यक्रममा प्रशिक्षक इश्वर श्रेष्ठले ३ घण्टा भन्दा बढी समय अभिभावक तथा विद्यार्थी शिक्षकहरुलाई कसरी पढ्ने, अभिभावक र स्कुलको सम्बन्ध कसरी राम्रो बनाउने भन्ने विषयमा प्रशिक्षण दिएका थिए । प्रशिक्षण कार्यक्रममा उपस्थित अभिभावक, विद्यार्थीहरु कार्यक्रम अवधिमा निकै भाबुक भएका थिए भने यस कार्यक्रमले अभिभावक, विद्यार्थीमा परिवर्तन आउने उपस्थित अभिभावकहरुले बताए ।
विद्यालयको वार्षिक उत्सव कार्यक्रममा विद्यार्थीहरुले सदन अनुसार नृत्य प्रस्तुत गरेका थिए । ६४ औं वार्षिक उत्सव कार्यक्रममा स्कुलका प्र.अ कृणालाल सापकोटाले यस स्कुलले अब्बल विद्यार्थी उत्पादन गर्दै आएको भए पनि पछिल्लो समयमा केही समस्या आएको बताए । अहिले देखिएको समस्या समाधान गर्नको लागि अभिभावक, विद्यार्थी, शिक्षकहरुलाई विद्यालयको ६४ औं वार्षिक उत्सवको अवसरमा प्रशिक्षण कार्यक्रम राखेको छौ यसले आगामी दिनमा केहि सुधार हुने बताए । साथै भूतपूर्व विद्यार्थी क्लबलाई पनि धन्यबाद दिदै आगामी दिनमा पुलको काम गर्न अनुरोध गरेका थिए ।
भूतपूर्व विद्यार्थी क्लबले १६ पुसमा स्वास्थ्य दन्त शिबिर राखेर २५० भन्दा बढी विद्यार्थीले लाभ लिएका थिए । त्यस्तै कार्यक्रमको समापन गर्दै विद्यालय व्यावस्थापनका अध्यक्ष कर्ण बहादुर थापा (बिलभ)ले स्कुलले शिक्षाको साथै भौतिक पुर्वधार निर्माण गर्नु पर्ने आवश्यकता रहेको बताए । युवाले चाहे परिवर्तन सम्भव छ । हामी त्यही परिवर्तन गर्न यहाँ आएको छौ । हाम्रो यो अभियानमा हातेमालो गरेर अगाडि बढ्न अभिभावक, विद्यार्थी, शिक्षकहरुलाई अनुरोध गर्दै कार्यक्रम समापन गरेका थिए ।
