सुत्केरी खान माइत आएकी निरुताको एक महिनाको छोरालाई खोलाले बगाउदा निधन

आश बहादुर गुरुङ्ग

आश्विन २, २०७७ शुक्रवार • १५:५४:४९ बजे

1.2K

सुत्केरी खान माइत आएकी निरुताको एक महिनाको छोरालाई खोलाले बगाउदा निधन

ठोरी–माडी सडकखण्ड अन्तर्गत चितवन राष्ट्रिय निकुञ्जको टिउकी खोलाले ट्याक्टर बगाउँदा एक शिशुको मृत्यु भएको छ । मृत्यु हुनेमा शिशु कञ्चनपुरका सन्तोष सुनार र निरुताका करिब एक महिनाका छोरा रहेका छन् ।

कञ्चनपुरबाट पर्साको ठोरी गाउँपालिका–१ सरस्वतीनगरस्थित निरुताको माइती घरमा जाने क्रममा बिहीबार राति करिब १० बजेको समयमा टिउकी खोलाले बगाउँदा शिशुको मृत्यु भएको हो ।

ठोरी गाउँपालिका-१ का वडाध्यक्ष रामप्रकाश कुँवरका अनुसार बसका यात्रुलाई ट्याक्टरमा सिफ्ट गरेर फर्कने क्रममा टिउकी खोलाको बाढीले ट्याक्टर बगाएको थियो ।

खोलाले ट्याक्टरलाई पल्टाउन खोज्ने क्रममा सन्तोषकी श्रीमती निरुताको काखबाट छोरा एक्कासी खोलामा खस्न पुगेको बताइएको छ । सन्तोष, निरुतालगायत अन्य यात्रुलाई भने नेपाली सेनाको टोलीले सकुशल उद्धार गरेको उनले बताए ।

वडाध्यक्ष कुँवरका अनुसार सुत्केरी खानका लागि निरुता एक महिनाको छोरालाई लिएर माइत आएकी रहेछन् । बच्चा सानै भएका कारण सन्तोष पनि सुत्केरी श्रीमतीलाई ससुरालीसम्म पुर्‍याउन आएका थिए । सोही क्रममा उनको परिवार दुर्घटनामा परेको हो ।

अविरल वर्षा र बाढीका कारण शुक्रबार बिहान मात्रै नेपाली सेना, नेपाल प्रहरी र सशस्त्रको टोलीले बेपत्ता बालकको खोजी गर्दा शव फेला पारेको वडाध्यक्ष कुँवरले बताए ।