कास्की - राष्ट्रिय गौरवका आयोजनामध्ये निर्माणाधीन पोखरा क्षेत्रीय अन्तरराष्ट्रिय विमानस्थलको निर्माण कार्य तीव्र रुपमा हुँदैछ ।
पर्यटकीय शहर पोखरामा निर्माणाधीन विमानस्थल बन्दाबन्दीको समयमा पनि जना ३४४ कामदारले निरन्तर कार्य गरी हाल ६० प्रतिशत सम्पन्न भएको विमानस्थल निर्माण आयोजनाले जानकारी दिएको छ ।
चिनियाँ निर्माण कम्पनी सीएमसीईले ११ अगस्त २०१७ बाट यो विमानस्थल निर्माण शुरु गरेको हो । सन् २०२१ जुलाई १० मा विमानस्थल निर्माण कार्य सम्पन्न गरी नेपाल सरकारलाई हस्तान्तरण गर्ने सम्झौता अनुरुप काम भइरहेको छ ।
पूर्वप्रधानमन्त्री केपी ओलीको चीन भ्रमणका बेला दुई देशबीच ऋण सम्झौता भएर निर्माणको प्रक्रिया अघि बढेको थियो । चीनको एक्जिम बैंकको करीब रू. २२ अर्ब ऋणमा यो विमानस्थलको निर्माण कार्य शुरु भएको हो ।
