- ट्रेण्डिङ :
कुवेत — नेपाल पत्रकार महासंघ वैदेशिक शाखा कुवेतले फोटो पत्रकार सुरेश कुमार गुरुङ्लाई एक विशेष कार्यक्रमको आयोजना गरि बिदाई गरेको छ ।
अध्यक्ष एकराज मल्लको सभाध्यक्षतामा साल्मियास्थित एसियन चुलो रेस्टुरेन्टमा २६ डिसेम्बर २०२५ शुक्रवार पत्रकार महासंघका पदाधिकारी, नेपाली समुदायका प्रतिनिधि लगायतको उपस्थितिमा बिदाई कार्यक्रम सम्पन्न गरिएको थियो । नेपाल पत्रकार महासंघ वैदेशिक शाखा कुवेत, निरेम ग्रुप कुवेत, कुवेत नेपाल डटकम र माउन्ट एभरेष्टले संयुक्तरुपमा बिदाई गरेका थिए ।
पत्रकार गुरुङ सस्थापक सदस्य हुँदै हाल कोषाध्यक्ष पद सम्हालिरहेका थिए । कुवेतको नेपाली समाजमा प्रवासी कार्यव्यस्तताको बाबजुद पनि बचेको समयलाई सदुपयोग गर्दै पत्रकारितामा समर्पित रही निकै लोकप्रिय रहेका थिए । उनले फोटो पत्रकारितामा पुर्याएको योगदानलाई उच्च मुल्यांकन गर्दै सम्मान गरिएको थियो । पत्रकार गुरुङ विगत २४ वर्ष देखि कुवेतमा कार्यरत छन । लामो वैदेशिक यात्रालाई बिट मारी गुरुङ स्वदेश फर्किन लागेका हुन ।
कुवेतको पहिलो अनलाईन मिडिया कुवेत नेपाल डटकम र मनकामना डटकममा समेत गुरुङ आवद्ध छन । पत्रकार महासंघ कुवेत शाखाका अध्यक्षले भने "सुरेश कुमार गुरुङले कुवेतको नेपाली समाजमा पत्रकारितामा अमुल्य योगदान पुऱ्याउनुभयो त्यो कदरयोग्य छ । साथै उज्ज्वल भविष्यका लागि शुभकामना व्यक्त गर्दछु।"
यस अवसरमा सुरेश कुमार गुरुङले आफूले पाएको सम्मानप्रति आभार व्यक्त गर्दै आगामी दिनमा स्वदेशमा पनि पत्रकारितामा सक्रिय रही काम गर्ने प्रतिबद्धता व्यक्त गरे । साथै, उनले नेपालमा रहे पनि पत्रकार महासंघ कुवेत शाखा संग सधै सहकार्य गर्ने बताएका थिए ।
त्यस्तै मनकामना मिडियामा विगत तीन वर्षदेखी आवद्ध रहेका नयाँ सदस्य बेद कुमार गुरुङलाई स्वागत गरिएको थियो । उनले नेपाल पत्रकार महासंघ वैदेशिक शाखा कुवेतमा सदस्यताको लागि निवेदन दिएका थिए । उनले दिएको निवेदनलाई कार्यसमितिले सर्वसम्मत पारित गर्दै आवद्ध गरिएको हो ।
