- ट्रेण्डिङ :
म्याग्दीको रघुगंगा गाउँपालिकामा सडक खन्ने क्रममा माथिबाट खसेको पहिरोले स्काभेटर पुर्दा एक जना चालकको मृत्युु भएको छ ।
बेग र बास्बोट बस्ती जोड्ने सडक विस्तारका क्रममा अचानक खसेको माटोको ढिस्कोले ५५ वर्षीय चालक पदम कार्कीलाई स्काभेटरसहित पुरेको हो । घटना लगत्तै स्थानीय र प्रहरीको टोली उद्धार तथा खोजी कार्यमा जुटेको थियो । घटनास्थलमा रहेका प्रहरी निरीक्षक सागर तिमिल्सीनाले अन्य डोजर र ब्याकुहोलोडर परिचालन गरेर पहिरोमा पुरिएका कार्कीको शव निकालेर परिक्षणका लागि प्रदेश अस्पताल बेनीमा पठाएको जानकारी दिएका छन ।
स्थानीय स्रोतका अनुसार दुर्घटनामा परेको उक्त स्काभेटर रघुगंगा गाउँपालिकाका अध्यक्ष भवबहादुर भण्डारीको हो । पहाडी भेगमा सडक खन्ने क्रममा भौगोलिक बनावटको अध्ययन र सुरक्षा मापदण्डको पालना नहुँदा यस्ता दुर्घटनाहरू बारम्बार हुने गरेका छन्। बेग-बास्बोट सडक खण्डमा पनि कमजोर भूबनोटका कारण पहिरो खसेको हुनसक्ने अनुमान गरिएको छ ।
वर्षायाम सुरु नहुँदै खसेको यो पहिरोले विकास निर्माणका कार्यमा अपनाउनुपर्ने सावधानीबारे पुनः प्रश्न उठाएको छ। कार्कीका परिवार र आफन्तहरू यतिबेला गहिरो चिन्तामा छन् । विकासको नाममा हुने यस्ता दुर्घटनाले मानवीय क्षति पुर्याउँदा स्थानीय समुदाय शोकमा डुबेको छ ।
