म्याग्दी बेनीमा सामाजिक दुरी कायम गर्दै एक स्वागत, सम्मान तथा शुभकामना आदानप्रदान कार्यक्रम सम्पन्न भएको छ । कोभिड १९ को जोखिमलाई ख्याल गर्दै सामाजिक दुरी कायम गरि उक्त कार्यक्रम गरिएको हो । परदेशमा पसिना बगाउन गएका युवाहरुले नेपाल विभिन्न हिसाबले बिपदमा पर्दा होस या सामाजिक रुपमा समस्या पर्दा होस आर्थिक तथा भौतिक सहयोग गर्ने म्याग्दीका तीन युवाहरुलाई स्वागत तथा सम्मान गरिएको हो ।
म्याग्दीका युवाहरु गोकुल बिस्वकर्मा, महेन्द्र बोहोरा र गोकुल रामदामलाई म्याग्दीमा स्वागत तथा सम्मान गरिएको हो । खाडी मुलुकमा रहेर पनि म्याग्दीमा बिपदमा हुँदा, कोही बिरामी पर्दा, या सामाजिक रुपमा विभिन्न आर्थिक सहयोग गरिएको भन्दै युवाहरुलाई सम्मान गरिएको हो । "जहाँ रहे पनि जहाँ भए पनि आफ्नो देश, समाज र गाउँठाउँ दुखमा परेको देख्न सकिन्नँ, सकेको सहयोग गरौं भन्ने भावना परदेशमा रहने जो कोहीलाई पनि हुन्छ" सम्मानित युवाहरुले बताए ।
दलित युवा संजाल म्याग्दीको आयोजनामा सम्पन्न उक्त कार्यक्रमको अध्यक्षता संजालको संयोजक किसान बिस्वकर्माले गर्नु भएको थियो । अतिथीहरु नेकपा प्रदेश सदस्य तथा दलित अगुवा टेकबहादुर बिस्वकर्मा, सामाजिक अभियान्ता, समाजसेवी तथा दलित अधिकारकर्मी लालु किसान, कुमार घर्ती बिस्वकर्मा लयातले दलितको साझा सवाल र अहिलेको आवस्यकता सम्बन्धमा आफ्ना भनाईहरु पस्केका थिए । विभिन्न कलाकार, खेलाडी, विद्यार्थी नेता तथा पत्रकार सहितको उपस्थिति रहेको उक्त कार्यक्रममा दलित युवा संजालको उदेश्य र काम कर्तव्य बारेमा संजालका सदस्य भोजबहादुर थापा किसानले आफ्ना भनाई राखेका थिए ।
युवाहरु ब्यबसायिक बन्न पर्ने कुरामा जोड दिदै कोभिड १९ र चाडवाडको कारण संजालले त्यस्ता कार्यक्रमहरु गर्न नसकेको संस्थाका संयोजकले बताउनु भयो । चाडवाड सकिए पछि र कोभिड १९ अझै हल्का भएमा आफ्नो संगठन बिस्तार गर्ने संयोजकले जानकारी दिनु भयो । कार्यक्रममा आउदै गरेको महान पर्व दशै तिहारको शुभकामना पनि आदानप्रदान गरिएको थियो ।
