कोरोना संक्रमणबाट पोखरामा ६ जनाको निधन भएको छ । स्वास्थ्य निर्देशानलय गण्डकी प्रदेशका अनुसार आइतवार र सोमवार दुई दिनको अन्तरालमा ५ पुरुष र एक महिलाको निधन भएको हो ।
पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पताल कोभिड-१९ उपचार केन्द्रमा उपचाररत ४ पुरुष र चरल मेमोरियल र गण्डकी मेडिकल कलेज गरी ६ जना संक्रमितको कोरोनाका कारण मृत्यु भएको हो ।
मृत्यु हुनेमा पोखरा-१८ निवासी ५१ वर्षीय पुरुषको आइतबार राति ९:४५ बजे उपचारकै क्रममा निधन भएको गण्डकी प्रदेश स्वास्थ्य निर्देशनालय पोखराका निर्देशक बिनोदबिन्दु शर्माले वताउनुभयो । उहाँलाई यही मंसिर ११ गते कोरोना संक्रमण पुष्टि भई केन्द्रमै उपचार शुरु गरिएको थियो ।
त्यस्तै स्याङ्जाको वालिङ नगरपालिका-१४ का ६७ वर्षीय कोरोना संक्रमित पुरुषको सोमबार बिहान मृत्यु भएको छ । स्वास्थ्य विज्ञान प्रतिष्ठानको उपचार केन्द्रमा उपचाररत उहाँका बिहान २।१० बजे निधन भएको हो । यही मंसिर ११ गते कोरोना संक्रमण पुष्टि भई केन्द्रमा उपचार शुरु गरिएको थियो ।
पोखरा ३ का ६५ वर्षीय पुरुषको आइतबार दिउसो ४ : ३३ बजे उपचारको क्रममा मृत्यु भएको हो । उनलाई मंसिर ८ गते कोरोना पुष्टि भएको थियो ।
पोखरा ११ का ६० वर्षीय पुरुषको आइतबार बिहान ५ :४५ बजे उपचारको क्रममा मृत्यु भएको छ ।मंसिर ८ गते कोरोना संक्रमण पुष्टि भइ पोखरा स्वास्थ्य विज्ञान प्रतिष्ठानको कोभिड १९ उपचार केन्द्रमा उपचाररत थिए ।
मंसिर १२ गते कोरोना संक्रमण पुष्टि भइ पोखराको चरक मेमोरियल हस्पिटलमा उपचाररत पोखरा १६ की ५७ वर्षीया महिलाको सोमबार बिहान ४ :०० बजे उपचारकै क्रममा मृत्यु भएको हो ।
यस्तै मंसिर ११ गते कोरोना संक्रमण पुष्टि भइ पोखराको गण्डकी मेडिकल कलेजमा उपचाररत पोखरा १९ का ५७ वर्षीय पुरुषको शनिबार राति ९ :२० बजे उपचारकै क्रममा मृत्यु भएको हो ।
