म्याग्दीमा कार्यरत रहँदा गर्भपतन गराएको आरोपमा बैदाम कास्कीका इन्सपेक्टर शर्मा पक्राउ

आश बहादुर गुरुङ्ग

पौष २, २०७७ बिहिवार • १४:१६:४१ बजे

8.1K

म्याग्दीमा कार्यरत रहँदा गर्भपतन गराएको आरोपमा बैदाम कास्कीका इन्सपेक्टर शर्मा पक्राउ

कास्की । श्रीमतीको इच्छाविपरित गर्भपतन गराएको आरोपमा नेपाल प्रहरीका निरीक्षक (इन्सपेक्टर) पक्राउ परेका छन् । वडा प्रहरी कार्यालय बैदाम, कास्कीमा कार्यरत इन्सपेक्टर धुव्र शर्मा पक्राउ परेका हुन् ।

जिल्ला प्रहरी कार्यालय, म्याग्दीमा कार्यरत रहँदा इन्सपेक्टर शर्माले सोही स्थानकी युवतीसँग प्रेम सम्बन्धमै छँदा विवाहको प्रलोभन देखाएर शारीरिक सम्पर्क गरेको प्रहरी अनुसन्धानबाट खुलेको छ । विवाह गरेको केही दिनपछि इन्सपेक्टर शर्माले जबरजस्ती ती युवतीलाई पर्वतकै एक क्लिनिकमा गर्भपतन गराएका दबाब दिएका थिए ।

पीडित स्मृति शर्माले प्रेम सम्बन्ध रहेकै समयमा विवाह गर्ने प्रलोभन देखाएर शारीरिक सम्पर्क गरेपछि गर्भ रहेको र विवाहपछि जबर्जस्ती गर्भपतन गराएको आरोपसहित उजुरी गरेपछि प्रहरी निरीक्षक शर्मालाई मंसिर २३ गते कार्यरत स्थलबाट नै गिरफ्तार गरेको जिल्ला प्रहरी कार्यालय पर्वतले जनाएको छ । पीडित युवतीले जबरजस्ती भ्रुणहत्या गरेको आरोपमा मंसिर १५ गते उजुरी दिएकी थिइन् ।

घटनास्थल पवर्तको कुस्माबजार भएकाले शर्मालाई पर्वत पठाइएको छ । शर्मामाथि जिल्ला अदालत पर्वतबाट १० दिनको म्याद थप भएको र अनुसन्धान भइरहेको जिल्ला प्रहरी कार्यालय पर्वतका प्रहरी निरीक्षक मनीष श्रेष्ठले जानकारी दिए ।

पीडित युवती र इन्सपेक्टर धु्रुव शर्माबीच प्रेम सम्बन्ध रहेकै समयमा सम्बन्धमा खटपट आएको थियो । युवती गर्भवती भइसकेपछि शर्माले अर्कै युवतीसँग विवाह गर्ने तयारी गरेका थिए । पीडित युवतीले अर्कै युवतीसँग विवाह गर्न लागेको थाहा पाएपछि अधिकारकर्मीको सहयोगमा प्रहरी निरीक्षकसँग उनले विवाह गरेकी थिइन् ।