आश तमु , पोखरा - बलात्कार आरोपमा पक्राउ परेका सशस्त्र प्रहरी बलका बरिष्ठ उपरीक्षक (एसएसपी) राजेन्द्र अधिकारीलाई दोस्रो पटक थप सात दिन म्याद थपिएको छ ।जिल्ला अदालत कास्कीले अधिकारीमाथि अनुसन्धान गर्न सात दिन म्याद थप गरेको हो ।
एसएसपी अधिकारी सशस्त्र प्रहरी, हुल तथा दंगा व्यवस्थापन शिक्षालय लामपाटन पोखराका प्रमुखको रुपमा कार्यरत थिए । उनलाई बलात्कार गरेको आरोपमा कास्की प्रहरीले असार ३१ पक्राउ गरेका थिए ।
चितवनकी करिब २७ वर्षकी युवतीले आफूलाई अधिकारीले खाना खान बोलाएर बलात्कार गरेको भन्दै जिल्ला प्रहरी कार्यालय कास्कीको कन्ट्रोल रुममा ३१ असारमा फोनमार्फत जानकारी गराएकी थिइन् ।
पीडित महिलालाई एसएसपी अधिकारीले खाना खान बोलाएर जबर्जस्ती करणी गरेको आरोप छ । घटनालगत्तै पीडित महिलाले बुधबार दिउँसो सवा २ बजे प्रहरीको कन्ट्रोल नम्बर १०० मा फोन गरेपछि तत्कालै घटनास्थलमा प्रहरी पुगेको थियो ।
एसएसपी अधिकारीलाई झाडीभित्र लुकिरहेको अवस्थामा प्रहरीले पक्राउ गरेको थियो ।युवतीले खानपिन गर्ने क्रममा आफूलाई लठ्याउने औषधी खुवाएर बलात्कार गरेको प्रहरीसमक्ष प्रारम्भिक बयान दिएकी छन् ।
