- ट्रेण्डिङ :
पोखरा । कास्कीको मादी गाउँपालिकामा केही दिनअघिको बाढी पहिराेमा परी विस्थापित घर परिवारलाई पुनःबासको व्यवस्था गर्न माग गरिएको छ ।
गण्डकी प्रदेशका मुख्यमन्त्री कृष्णचन्द्र नेपालीलाई आज नेपाली काँग्रेस र नेकपा माओवादी केन्द्रको गाउँ कमिटीले ध्यानाकर्षणपत्र बुझाउँदै विस्थापितको पुनःबास, पीडितको संरक्षण, उद्धार, राहत वितरण तथा मादी नदी नियन्त्रण गर्न तटबन्धको माग गरेको माओवादी केन्द्रका गाउँ कमिटी अध्यक्ष कृष्णराज दाहालले बताउनुभयो ।
बाढीबाट मादीमा निर्माणाधीन तथा सञ्चालनमा रहेका जलविद्युत् आयोजनामा नोक्सानी पुगेको, विद्युत पोल ढल्दा गाउँहरु बिजुलीबाट वञ्चित रहेको र सडक अवरुद्ध हुँदा सवारी सञ्चालन ठप्प रहेकाले अविलम्ब सडक खुलाउन सरकारको ध्यानाकर्षण गराइएको थियो ।
सो अवसरमा मुख्यमन्त्री नेपालीले तत्काल गर्न सकिने काम तुरुन्त शुरु गर्ने र दीर्घकालीन महत्वका कार्यलाई योजनामा समेटिने बताउनुभयो ।
नेपाली काँग्रेसका जिल्ला सभापति कृष्ण केसी र माओवादी केन्द्रका जिल्ला सचिव बखानसिँह गुरुङलगायत दुवै दलका जिल्लास्तरका नेताको उपस्थितिमा मुख्यमन्त्री नेपालीलाई ध्यानाकर्षण गराइएको थियो ।
