- ट्रेण्डिङ :
सर्लाही । सर्लाहीको ईश्वरपुर नगरपालिका–३ भक्तिपुरका वडाध्यक्ष सूर्यकुमार श्रेष्ठको शुक्रबार राति हत्या भएको छ । सरकारी पोखरी खन्ने क्रममा एक्स्काभेटर चालकसँग विवाद हुँदा एक्स्काभेटरको बकेटले ठक्कर दिइ वडाध्यक्ष श्रेष्ठको हत्या गरिएको प्रहरीले जनाएको छ ।
राति अबेरसम्म वडाध्यक्ष श्रेष्ठ, पोखरी खनाउने ठेकेदार प्रेमराज दाहाल र एक्स्काभेटरका चालक हर्कबहादुर तामाङ नजिकैको होटलमा सँगै खाजा खाएर बसेका थिए ।
राति करिब १० बजेपछि खाजा खाएर घर फर्कने क्रममा एक्स्काभेटरका चालक तामाङसँग वडाध्यक्ष श्रेष्ठको विवाद भएको र सोही क्रममा पोखरी खन्ने स्थानमा पुगेपछि चालक तामाङले एक्स्काभेटर चलाएर एक्स्काभेटरको बकेटले वडाध्यक्ष श्रेष्ठलाई लडाएर माटोले पुरेको पाइएको प्रहरी उपरीक्षक सन्तोषसिंह राठौरले बताए ।
अचेत अवस्थामा फेला परेका वडाध्यक्ष श्रेष्ठलाई उपचारका लागि अस्पतालमा पुर्याइए पनि चिकित्सकले मृत घोषणा गरेका थिए । प्रहरीले घटना संलग्न रहेको आरोपमा ठेकेदार ईश्वरपुर नगरपालिका–३ का ३५ वर्षीय प्रेमराज दहाल एक्स्काभेटरका चालक बरहथवा नगरपालिका–१ का ३८ वर्षीय हर्कबहादुर तामाङलाई नियन्त्रणमा लिएको छ ।
