- ट्रेण्डिङ :
काठमाडौं उपत्यकामा निषेधाज्ञा खुकुलो भएसँगै कोरोना संक्रमण दर फेरि बढ्न थालेको छ । सोमबार स्वास्थ्य मन्त्रालयले सार्वजनिक गरेको तथ्याङकअनुसार उपत्यकाका तीनै जिल्लामा संक्रमण बढेको देखिन्छ । काठमाडौंमा ३५५, ललितपुरमा ११२ तथा भक्तपुरमा ४७ गरी थप ५ सय १४ जनामा संक्रमण पुष्टि भएको छ ।
केही दिनअघि उपत्यकामा दैनिक संक्रमण घट्न थालेको थियो । गत सातादेखि सरकारले पसलहरु सञ्चालन गर्न दिने र निजी सवारी साधन पनि जोर–बिजोरका आधारमा सञ्चालन गर्न दिने निर्णयपछि भिडभाड बढेको छ । जसकारण संक्रमण बढेको आशंका गरिएको छ । मंगलबारदेखि त सरकारले उपत्यकामा ठूला बस समेत सञ्चालन गर्न दिने निर्णय गरेको छ ।
सर्वसाधरणले समेत स्वास्थ्य मापदण्ड पालना नगर्दा जोखिम बढेको चिकित्सकहरु बताउँछन् ।
पछिल्लो २४ घण्टामा थप २ हजार ४४४ जनामा कोरोनाभाइरसको संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार ११ हजार ६४० जनाको परीक्षण गर्दा पीसीआर विधिबाट १५०९ र एन्टिजेन विधिबाट ९३५ रहेका छन् । यही अवधिमा थप ३ हजार ८५३ जना निको भएका छन् भने थप ४२ जनाको मृत्यु भएको छ । यससँगै नेपालमा सङ्क्रमितको कुल सङ्ख्या छ लाख ६४ हजार पुगेको छ भने मृतकको सङ्ख्या ९,०५१ पुगेको छ । अहिले कुल ३५,०७५ जनामा सक्रिय सङ्क्रमण रहेको र तीमध्ये २,८७५ जना संस्थागत आइसोलेशनमा रहेका छन् ।
कुल सक्रिय सङ्क्रमितमध्ये ८,३९७ जना काठमाण्डू उपत्यकामा रहेका छन् । अहिले देशभरिका २० जिल्लामा ५०० भन्दा बढी सक्रिय सङ्क्रमित छन् भने थप २६ जिल्लामा २०० भन्दा बढी सक्रिय सङ्क्रमित रहेका छन् । अहिले सङ्क्रमितको सङ्ख्या घटेको भए पनि पुष्टि हुनेमध्ये अन्यत्रको तुलनामा काठमाण्डू उपत्यकाका धेरै भएको तथ्याङ्कले देखाउँछ । सोमवार पुष्टि भएकामध्ये काठमाण्डूमा ३५५ जना छन् भने ललितपुर र भक्तपुरका क्रमशः ११२ र ४७ जना रहेका छन् ।
एक सयभन्दा धेरैमा सङ्क्रमण पुष्टि भएका जिल्लाहरूमा झापा १९३ जना र मोरङ ११६ जना रहेका छन् । मन्त्रालयका अनुसार सङ्क्रमितमध्ये अहिले ६५७ जना देशभरिका विभिन्न अस्पतालका आईसीयूमा र १९३ जना भेन्टिलेटरमा छन् । लिङ्गका आधारमा हेर्दा कोभिडबाट सङ्क्रमित हुनेहरूमा ३९।२५ प्रतिशत महिला छन् भने ६०।७५ प्रतिशत पुरुष छन् ।
