- ट्रेण्डिङ :
जुम्लाको सिञ्जा गाउँपालिका ६ का वडाध्यक्ष कालीबहादुर बुढाले स्थानीय दलित युवा बिवेन्द्र नेपालीमाथि जातीय गालीगलौज र कुटपिट गरि पहिलो पटक जातीय विभेद विरुद्धको मुद्दा दर्ता भएको छ । अध्यक्ष कालीबहादुर बुढा र उनका छोरा नवीन बुढा विरुद्ध जातीय विभेद विरुद्धको मुद्दा दर्ता भएको हो ।
असार ८ गते राखिएको विवाद समाधान बैठकमा सबैका सामु वडाध्यक्ष बुढाले नेपालीमाथि जातीय गालीगलौजका साथै कुटपिट गरेको पीडित युवाले बताएका छन् । उनका अनुसार वडाध्यक्षले कुकुर भनेर विभेद गर्दै गालीगलौज गरेको र वडाध्यक्षका छोरा नवीन बुढाले कुटपिट गरेका थिए । पीडित विवेन्द्र नेपालीले आफूले वडामा भएको विकासको विषयमा वडा अध्यक्ष बुढाले सार्वजनिक रूपमा दिएको अभिव्यक्तिको विषयमा टिप्पणी गरेपछि आफूमाथि विभेद भएको भन्दै जिप्रका जुम्लामा मुद्दा दर्ता गर्न खोजेका थिए । तर विगत दुई दिन देखि जुम्ला प्रहरीले मुद्दा दर्ता गर्न मानेको थिएन । शुक्रवार जिल्लाका दलित युवा तथा अधिकारकर्मीहरूको चर्को दबाबपछि प्रहरी मुद्दा दर्ता गर्न बाध्य भएको हो ।
अधिकारकर्मी गोविन्द्र सुनारले दुई दिनको अथक प्रयासपछि मुद्दा दर्ता भएको बताए । उनका अनुसार विवेन्द्र नेपाली आवेदक रहेको उक्त मुद्दा दर्ता नम्बर ८४ मा दर्ता भएको छ । मुद्दा दर्ता हुनु राम्रो कुरा भएको भन्दै उनले अब दोषीलाई कानुनी दायरामा ल्याउनुपर्ने बताएका छन् । मुद्दा दर्ता भएपछि आफूलाई विभेद गर्ने पीडकले कारबाही भोग्ने आस लागेको पीडित विवेन्द्र नेपालीले बताएका छन् । अधिकारकर्मी धनराज सुनार दोषीलाई कानुनी दायरामा ल्याउन र कारबाहीको लागि सशक्त रूपमा अघि बढ्नुपर्ने बताउँछन् ।
