शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
तनहुँ । तनहुँमा बाघको छाला, खप्पर, हड्डीसहित तीनजना पक्राउ परेका छन् ।
व्यास नगरपालिका–५, पतेनीस्थित पक्की पुलनजिक बाख्रेतर्फ जाने कच्ची सडकबाट बाघको अवैध छाला, खप्पर, हड्डीलगायत अंगसहित तीनजनालाई प्रहरीले पक्राउ गरेको हो ।
पक्राउ पर्नेहरूमा व्यास नगरपालिका–६, सिरुबारी बस्ने ३९ वर्षीय अर्जुन श्रेष्ठ, शुक्लागण्डकी नगरपालिका–१, ओखल्दी बस्ने ४० वर्षीय सन्जित गुरुङ र व्यास नगरपालिका–१, रतनपुर बस्ने ३२ वर्षीय सन्तोष गुरुङ रहेका छन् ।
उनीहरूमध्ये अर्जुनको साथबाट दुईथान बाघको छाला, बा४९प ५९२३ नम्बरको स्कुटर, एकथान मोबाइल र नगद एक हजार रुपैयाँ, सन्जितको साथबाट १२२ वटा बाघका हड्डीहरू, ग१८प ५४११ नम्बरको मोटरसाइकल, एकथान मोबाइल र नगद दुई हजार रुपैयाँ र सन्तोषको साथबाट बा३५प ५४५१ नम्बरको मोटरसाइकल, नगद तीन हजार ५८५ रुपैयाँ, एक थान लाइटर र एकथान मोबाइल प्रहरीले बरामद गरेको छ ।
सोही ठाउँस्थित सडकमा शंकास्पद गतिविधि गरिरहेका उनीहरूलाई नेपाल प्रहरीको केन्द्रीय अनुसन्धान ब्युरो महाराजगन्ज र जिल्ला प्रहरी कार्यालय तनहुँबाट खटिएको प्रहरीले जाँच गर्ने क्रममा उक्त अंगहरूसहित फेला पारी पक्राउ गरेको जनाइएको छ ।
