शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
पहिरोले पृथ्वी राजमार्ग अवरुद्ध ,पहिरोमा पुरिएर एकै घरका तीन जनाको मृत्यु चितवनको घोप्टे भीरमा पहिरो जाँदा पृथ्वी राजमार्ग अवरुद्ध भएको छ ।
इच्छाकामना गाउँपालिका–४ घोप्टे भीरमा गएराती पहिरो जाँदा पृथ्वी राजमार्ग अवरुद्ध भएको हो। आज बिहान ५ बजेबाट पहिरो पन्छाउन सुरु गरिएको चितवन ट्राफिकले जानकारी दिएको छ ।
आज दिउँसोसम्ममा सडक सञ्चालनमा आउने ट्राफिक प्रहरीले जनाएको छ । सडक अवरुद्ध भएपछि गएरातीदेखि नै जाममा परेका सवारी साधनको दुवैतर्फ लामो लाइन लागेको छ ।
"गुल्मीमा पहिरोमा पुरिएर एकै घरका तीन जनाको मृत्यु"
गुल्मीमा गएराति अविरल वर्षासँगै गएको पहिरोमा पुरिएर एकै घरका तीन जनाको ज्यान गएको छ । रेसुङ्गा नगरपालिका वडानम्बर–८ खानिगाउँ थुम्का लाइन बस्ने २१ वर्षीया भावना परियार, १४ वर्षीया गंगा परियार र १४ वर्षीया जमुना परियारको मृत्यु भएको जिल्ला प्रहरी कार्यालय गुल्मीका प्रहरी नायव उपरीक्षक (डीएसपी) पुरुषोत्तमप्रसाद पाण्डेले जानकारी दिए ।
घरमाथिबाट आएको पहिरोले एक तले पक्की घर पुरिएपछि बीचको कोठामा सुतेका तीनै जना दिदीबहिनीको मृत्यु भएको डीएसपी पाण्डेले बताए । स्थानीय तिलक परियारको घरमा ६ जनाको परिवार थियो ।
जसमध्ये ३ जना छोरीको मृत्यु भएको र उनकी श्रीमती र एक छोरी भने सकुशल रहेको प्रहरीले जनाएको छ । स्थानीयवासी, नेपाली सेना र नेपाल प्रहरीको सहयोगमा तीन जनाकै शव आज बिहान साढे ४ बजे निकालेर पोस्टमार्टमका लागि गुल्मी अस्पताल तम्घास पठाइएको प्रहरीले जनाएको छ ।
गएराति करिब दुई बजे पहिरोले तीन जना पुरिएको खबर पाएपछि जिल्ला प्रहरी कार्यालय गुल्मीका प्रहरी उपरीक्षक (एसपी) गोपालचन्द्र भट्टराईको नेतृत्वमा २५ जनाको प्रहरी टोली घटनास्थल पुगेको थियो ।
