- ट्रेण्डिङ :
२४ घण्टामा देशभर १०३० जनामा कोरोनाभाइरस संक्रमण पुष्टि भएको छ । सोही अवधिमा १ हजार जना निको भएको स्वास्थ्य तथा जनसंख्या मन्त्रालयले जनाएको छ। यस्तै बितेको २४ घण्टामा थप १० जनाले ज्यान गुमाएका छन् ।
यससँगै देशभर कोरोनाबाट ज्यान गुमाउनेको संख्या ११ हजार १७४ पुगेको छ । यस्तै हालसम्म पीसीआर विधिबाट भएको परीक्षणमा कुल ७ लाख ९८ हजार ४ जनामा संक्रमण पुष्टि भएको छ भने एन्टिजेन विधिबाट ९२ हजार २५२ जनामा संक्रमण पुष्टि भएको छ ।
संक्रमितमध्ये हालसम्म ७ लाख ७० हजार २२४ जना निको भएका छन् । हाल देशभर १६ हजार ६०६ जना सक्रिय संक्रमित रहेको पनि मन्त्रालयले जनाएको छ ।
गण्डकीमा थप ११२ जनामा कोरोना संक्रमण पुष्टि
गण्डकी प्रदेशमा थप ११२ जनामा कोरोना भाइरसको संक्रमण देखिएको छ । पछिल्लो चौबिस घण्टामा ७१७ जनामा गरिएको नमूना परीक्षणमा ११२ जनामा संक्रमण देखिएको हो ।
संक्रमितमध्ये ६३ महिला ४९ पुरुष रहेका छन् । प्रदेशमा विभिन्न जिल्लाहरुमा गरिएको नमूना परीक्षणमा सबैभन्दा धेरै संक्रमित कास्कीमा भेटिएको प्रदेश स्वास्थ्य आपतकालिन कार्य सञ्चालन केन्द्रका संयोजक नवराज शर्माले जनाकारी दिए ।
उनकाअनुसार कास्की ७०,बागलुङ ३, स्याङ्जा १२, म्याग्दी १, तनहुँ १० र नवलपरासी पूर्वमा ५ जनामा संक्रमण देखिएको हो । योसँगै गण्डकी प्रदेशमा कोरोना संक्रमितको संख्या ८५ हजार ९८८ पुगेको छ । गण्डकीमा कोरोना संक्रमणबाट थप ५ जनाको मृत्यु भएको छ ।
कोरोना संक्रमणबाट मृत्यु हुनेमा पोखरा– २२ का ५६ वर्षीय पुरुष, कास्की माछापुच्छ्रे गाउँपालिका –४ का ६४ वर्षीय पुरुष, तनहुँको शुक्लागण्डकी नगरपालिका –५ का ७२ वर्षीय पुरुष, स्याङजा विरुवा– ७ का ४५ वर्षीय पुरुष र म्याग्दी धौलागिरि गाउँपालिका –३ का ७६ वर्षीय पुरुष रहेका छन् ।
योसँगै गण्डकीमा कारोना संक्रमणबाट मृत्यु हुनेको संख्या १ हजार ३७१ पुगेको छ । प्रदेशमा पछिल्लो चौबिस घण्टामा २६४ जना कोरोना संक्रमणमुक्त भएका छन् ।
योसँगै गण्डकीमा हालसम्म संक्रमणमुक्त हुनेको संख्या ८३ हजार ५५८ पुगेको छ । त्यसैगरी गण्डकीमा सक्रिय संक्रमितको संख्या १ हजार ५९ पुगेको निर्देशनालयले जानकारी दिएको छ ।
